עס איז די טעלעפאן עפאכע, מענטשן ווערן אידענטיפיצירט דורך, זייער נאמען, זייער סאושעל, און זייערע עטליכע טעלעפאן נומערן.
הכלל די טעלעפאן נומער איז היינט א חלק פונעם מענטש, און עס וועט נאך קומען א תקופה וואס מ’וועט נישט טארן טשעפען מענטשן ביים טעלעפאן נומער, נישט צו בארירן די געפילן.
דאס איז שוין א פאקט, און זעהט אויס ווי ס’וועט אזוי בלייבן ביז מ’וועט אנהייבן אריינצונייען טשיפס אין אויער אלס פולקאמע קאמיוניקאציע, אלס צו זיין אין די לופטן, זיך צו הערן שנארכן ביינאכט וכדו’.
וואס מיך שטערט איז, ווען מענטשן וואס ווילן צו מיר רעדן, רופן מיך אויף מיין שכן’ס טעלעפאן, אדער אויף מיין חבר’ס טעלעפאן, און אמאל אפילו אויף א פרעמדן’ס וואס איך ווייס ניטאמאל ווער דער יעניגער איז.
איך מיין, אז איר ווילט צו מיר רעדן, ווערט געוואויר מיין טעלעפאן נומער און איך וועל מיט אייך גערן רעדן, און וויסן זאלט איר אז ווען איר רופט מיך אויף מיין שכן’ס נומער, קען איך נישט ענטפערן! איך בין אפילו נישט אין זעלבן קאר, איך הער נאר ארויס אלעס וואס איר זאגט, אבער איר קענט נישט הערן וואס איך האב צו ענטפערן, איז דאס יושר?
אה! נישט מיך האט איר גערופן אין מיין שכן’ס יוקאן?
וואס דען דארף איך מיטהאלטן די גאנצע שמועס בעל כרחך?
—
יענס געלעכטער דאס. א נייע מאדנע משוגעת וואס רעגיסטרירט זיך נישט ביי מיר אין מח, וויאזוי נארמאלע מענטשן שעמען זיך נישט צו זיצן אין קאר און רעדן אויף די נייע פארגעשריטענע בלו טוט וועלכע האט ספיקערס צו די גאס.
איך געדענק נאך ווען נאר הצלחה קאר און ווען סערוויס, מיט 50 בני תורה וכו’ האבן געהאט אזא בלו טוט, און אלס ארומגעפארן אויסרופנדיג. “אכטונג אכטונג” וכו’.
זענט איר זיכער אז אייער אשת חיל מי ימצא וויל פארזאגן דעם שבת’דיגן ארדער אין א פראטעסט פארמאט אינמיטן שטאט?
זענט איר קלאר אז אייער בר פלוגתא איז גרייט זיך דן צו זיין פאר א פובליקום אינמיטן ראדני אדער גארפילד?
וואו איז די ביסל מענטשליכע באנעמונג? פארוואס ווען איך זאל זיך אויפשטעלן האלטן א דרשה אויף מיין קאר בין איך רעטארדעט, און איר זענט א העכסט נארמאלער מענטש וואס טוט אט דאס?
עס איז דעריבער מיין פארשלאג, אז פאר איר נוצט דעם קאר בלוטוט, זאלט איר איינמאל לאזן א צווייטן עס נוצן און שטעלט אייך אראפ אינדרויסן, און הערט אייך צו, ווערט געוואויר וויאזוי ס’זעהט אויס ווען מ’הערט דעם קול באשה אינדרויסן שרייען אויף אייך אז די קינדער זענען נישט פאלגזאם, אדער אנדערע מער פריוואטע שמועסן, און דאן באשלוסט צו ס’איז אידישלעך, מענטשליך, אדער סתם פאררוקט.
סאררי מ’האמיר זיך געטראפן.
זאלץוואסער 